Ch'est la rintrée, bas les masques !
Oyez, ch'est la rintrée ! In oublie l' bieau soleil de l'été, in ringe les claquettes, chés photos d'vacances. Au pas d' courses in va à l'école, au boulot. Un cartape pour chés tiots, un aute pour chés grands. Sauf que c't'année, nos cartapes sont équipés din masque. In masque au cas où ...
Au cas où quoi ?
Bin un masque si tin voisin d'école, d'palier, d'transport en commun, d'travail ... si y tousse pas din s'manche ; faut vite mette tin masque ! Un masque si y a trop d'grippe din chés airs. Un masque pour pas t'contaminer et contaminer chés ôtes. Un masque pour t'cacher et parler. Un masque pour pas ête démasqué. Avint in metto des masques pour jouer au bandit, in metto des masques à Venise, au bal ... à ch'teur in va devoir mette des masques pour pas ête malate !
J'vous l'deminde : où in va ? Ch'est tout de même préocupant tout cha.
In ce moment même, in est en trin d'interrer l'roi de l'pop ! Y est parti soudainement, comme cha, cha feso quelques années qui metto plus sin masque.
Depuis ch'début d'année, y z'on reconduit 17 000 personnes à l'frontière parce qu'y n'avotent pas de cartapes et donc pas de masque.
Y veulent nous gaver comme chés oies ; de l'peur, des convintions, des taxes, des schémas ... etc, etc. Mais attention hein, y nous gavent pas, y nous écrasent !
Faut-il faire un grèfe générale, pour dire quin n'à marre d'tout cha, marre de c'monte à sous, marre de c'monte à masque, marre d'ce monte qui tourne pu bin rond !

Nous, in a ch'plaisir d'jouer du théâte masqué sin masque. D'buquer à des portes in faisant des tiotes fantaisies. Tout cha, in toute liberté et pour pas quin nous fasse quier !
Bas les masques, ch'est la rintrée !